DIV'NU EUROPÉYIN

                On z'a dismontchi toutes nos frontières

                Eyèt r'satchi toutes les bârières.

                Toutes les uches sont st-aulôdje

                Pou permète aus-è bandits d' fé èrnôje.

                En fét', c'èst çoulà div'nu Européyin

                C'èst di permète aus autès vijins,

                Di v'nu à leû nôje fé leûs larçins

                Eyèt d'pèter au diâle avou l'butin.

                Ni vu ni conu!  On n'lès r'trouvent pus.

                Dins l'Europe is disparèchent-nu

                On voreût nos mète tèrtous d'su l'minme pîd,

                Et on n'sét d'djà nén d'su l'quéke danser dins s'payis.

                On vous ramonç'ler nos liârds

                Pou fé des Ecus,

                Mins lès autes, avou leûs dolars

                I s'dîdje-nut: Compte toudis d'su!

                Comint ç'qu'on va fé pou mindjî tèrtous l'minme ragoût ?

                Qué linwe on va causer pou s'dire bondjoû ?

                Pou yèsse Européyin, i faureût candjî branmint d's-afêres.

                Intrèz-nous, ç'n'est nén pou d'mwin, mes fréres.

                Hé!...Qui ça n'vos èspétche nén d'dwârmu

                Dji compte dissus.

                En ratindant, dimèrons come nos èstons

                Wallons d'vant tout. El restant, on s'è fout.