EL  ÈSTEÛT DJOLÎYE

                El esteût djolîye, ci p'tite djin-là,

                Qui d'mèreût droci à sakants pas.

                El si lèveût timpe pou d'aler travayî

                Et aveût bon goût pou s'abiyî.

                Dès pindants à ses orâyes

                Qui r'chènent-nu à dès mèdâyes.

                In chignon dissu s'tièss',

                Du roudje dissu ses lèpes

                Ene djakète sèréye come in r'cèpe.

                Des onges bén côpé,

                Tiréye à l'étikète come ène actrice di ciné.   

                Dj'èl riwéte passer catchi padrî m'fènièss',

                Tous les matins dji n'rat'reûs nén l'fièss'.

                Dji watche ètou qu'èle sint si bon

                L'pârfum qu'on lome "Pwèson".

                C'èst l'feume du gamin da Paulette

                I l'a vrémint chwèsi ène bèle pitite pouyète,

                Qu'i wéte bén à ly di n'nén l'piède!