L'ISTWÈRE D'ÈNE PLATE BÛSE
Djim' souvéns dins l'monjo d'mès grands-parints, diviè 1955, i
gn-aveût ène plate bûse, ène sitûve come on n'fét pus. À costé, in
batch' à tchèrbon.
D'sus l'bâre d'èl sitûve, on fèyeût sètchi les draps d'mwins. Di timps
in timps i faleût skeûde li feu avou ène grawîye pô p'tit trô d'èl
lontiène. Quand i gn-aveût des mach'fiêrs, on perdeût
l'étricwèsse pou lès r'satchî èyèt lès mète rafrèdi dins l'batch' à
cindes. Dins l'cofe on mèteût du bos à sètchi, ou dès cas'roles à
r'chaufer èyèt lès fiêrs à r'poli. Li coqu'mwâr èsteût toudis aclapé à
sus'dos.
Dins ène armwêre, du l'meûr, on mèteût l'pot-a-cafeu avou
s'ramponaû, èl sièrveût à rindji lès provisions. In p'tit bufèt
d'cûjène pou mète li véssèlle, ène tâbe èyèt dès tchèyêres, in
ridant pou les fourtchètes, les culîs, lès coutias. Li tâbe èsteût
gârnîye d'ène twèle ciréye, dès r'pôse-plats, in vâse avou
sakants fleûrs du djârdén.
Au meûr, li bâr à pupes èyèt dès montes, li coucou, li Crucifix, dès
imâdjes di sakants sints. Ene évier avou s'robinet èt ène pompe
pou l'eûwe di plouf. Au dos d'l'uche on pindeût lès lokes, à
l'coupète sakants gayoles à mouchons. (In canari, in sizè, in
pésson, in cardinâl.) Dins l'aute coin, ène cusignière, à costé,
l'bufèt avou l'posse radio èyèt s'n'antène boudin qui traverseût
l'cûjène.Dissus tchuminéye dès bibelots avou l'quinquèt. In p'tit
coussin èsteût acrotchi pou z-î muchî lès èwîyes à r'keûde. Di
l'aute costé, l'tchauss' pîd. Dissu l'tâblèt' d'èl fègnièss', on
mèteût l'bwèss' à racomaudâdge, èl réserv'di toubac, li bwèss'
en fièr pou l'réserv'à cigares. Lès vîyès gazètes ètînent dins
l'porte-journaux. Dins c'coin-là c'esteût l'bon vî fauteûy' di
m'grand-pére tout trawé. Mins avou ène anciène couvêrte, on
wèyeût nén lès trôs. Et puis, on esteût si bén d'dins qu'on n'aureût
jamés pinsè d'èl foute èvoye. Di l'aute costé d'èl sitûve, ène aute
fauteûy' pus p'tit, pou m'grand-mére.
Au plafond en plake di lambri, pindeût ène lampe avou in tube rond, èyèt
des rubans d'glu pou z-atraper lès mouches. Au gnût, pou rafrèdi
l'feu, on r'satcheût un rond ou deûs à l'sitûve; i fèyeût tout roudje au
plafond, èt ça ascléreût l'place.
Quand dj'èsteûs malâde, on mèteût dès coussins d'su dès
tchèyêres. Eyèt grand-mére dwarmè asto d'mi. On lèyeût d'aler
l'feu toute èl gnût.
Maugré toutes les vidj'rîyes, on esteût branmint mia qu'asteûr. Et
puis, mi, dj'adoreûs mi staurer pad-zous l'plate buse, drolà,
dj'aveû si bén tchaud.
