LI TOUR DU ROTON

        C’èst-in face d’èl tour qui dj’aveûs m’monjo

        Asteûr rén qu’d’èl vîre dji d’mèr’ tout bladjo

        C’èsteût l’fièrté di nos biâs coron

        L’grandeû di nos cités : « Li tour du Roton »

        Fleurons à l’glwère di nos tcherbonâdjes

        Ou tint d’mineûrs avi l’keûr à l’ouvrâdje

        À l’coupète di s’tièsse ses moulètes tournîs

        Pou r’monter l’cayôle di tous lès ouvrîs

        Monumint istorike pou lès oûyeux

        Tour di Babel pou sakants curieux

        Li vestîtche d’ène èpoke tcheûte à l’eûwe

        Minme Ste Bâbe èst asteûr disparuwe

        Nos oûyeux asteûr ni sont pus là

        C’èst bén triss’ di pinser à çoulà

        Mi grand-pére diskindeût dins l’fond

        Abiyî come in martchand d’loke

        I r’monteût ossi nwèr qui l’tcherbon

        Pou gangnî sakants sou èyèt dès mastokes

        Ewous c’qui t’ès èl vî timps passé ?

        Asteûr vén vîr on a tout rasè

        I dimèr’ pus qui l’tour du Roton

        Fière come in diâle al coupète di m’coron

        Pou s’souv’nu di nos ancyîns

        Dji seûs seûr qui n’da pus qu’yin

        Vos aurèz à cœûr d’awè ène pinséye

        Pou les cèns qu’on fét d’èle Wallonîye si rènoméye.