PARTÈZ !

                Partèz, si c'èst ça qu'vos vlèz.

                Quitèz l'monjone pou d'bon.

                Alèz-è cachi pus long

                Après ène aute feume qui vos plét.

                No mariâdje

                N'a stî qu'in feu di strin.

                Pèrdèz ène aute tchumin

                Alèz-è fé aute pau vo cârnâdje.

                Ni mètèz pus les pîds véci

                R'pirdèz vos lokes èyèt vo vîye frake.

                Cachèz après ène aute barake

                I gn-a p'tète ène sote qui vos vîra voltîye.

                Vos avèz djouwé au fau-pilâte

                Nos vlà asteûr dins in bèl emplâte.

                C'est-inutîle di vos mète à gngno

                Pusqui dji n'seûs pus à vo goût.

                Partèz avè vo bètche di Satan,

                Vos avèz pèstèlé m'coeûr

                Eyèt volé des anéyes di bouneûr.

                Alèz-è foute vos grâwes pus long, manant!

                À mès îs, vos n'valèz pus rén

                Inutîle di priyî pou co d'meurer.

                Vos avèz pris vo décision

                Partèz, qu'on dè finiche in côp pou d'bon !